Partizani vijon ecurinë pozitive në kampionat duke siguruar një fitore me mjaft peshë në transfertën e vështirë të Laçit. Të besuarit e trajnerit Mislav Karoglan triumfuan me shifrat minimale 1-0 në duelin e javës së 11-të të “Abissnet Superiore”, duke vijuar fazën e dytë me hapin e duhur.
Sfida u vendos në minutën e 20-të takimit. Mesfushori Sebastjan Spahiu fitoi me zgjuarsi një 11-metërsh dhe u tregua i saktë nga pika e bardhë, duke shënuar golin e tij të parë me fanellën e kuqe. Kjo goditje rezultoi vendimtare për fatin e takimit, duke u dhuruar kryeqytetasve tre pikë të arta.
Për herë të parë nën drejtimin e teknikut Karoglan, “Demat e Kuq” regjistrojnë dy fitore radhazi pa pësuar asnjë gol. Ky sukses merr vlera të dyfishta, pasi të kuqtë thyen një tabu trevjeçare pa fitore në transfertën kurbinase.
Me këtë trepikësh, skuadra konfirmon konsolidimin në lojë dhe rezultate në këtë start të fazës së dytë. Përballja e radhës për Partizanin do të jetë klasikja ndaj Vllaznisë.
