Konferenca e sotme për shtyp trajnerit Orges Shehi

Abilaliaj: Ju faleminderit për prezencën tuaj sot. Jam shumë i lumtur që kemi arritur në këtë moment. Siç e dini ishte një proçes po themi i vështirë dhe i gjatë , por e rëndësishme është rezultati dhe kjo është gjëja që ka rëndësi sot. Sot patjetër që prezantojmë një tjetër trajner kampion, një trajner të cilin e kemi dashur dhe e kemi menduar prej shumë kohësh dhe arritëm sot në këtë ditë. E thash edhe një herë jemi shumë të kënaqur sepse mendonim që ishte zgjedhja më e mirë dhe e duhur për të bërë proçesin e nevojshëm të rritjes të skuadrës dhe të klubit në tërësi.

Ndikuan rezultatet në vendimin për të emëruar Orges Shehin te Partizani –

Abilaliaj: Kam qenë i qartë në fillim të proçesit tranzitor që kemi patur. Ka qenë një proçes i vështirë deri diku edhe i komplikuar për mënyrërën se si kanë rrjedhur gjërat. Ka qenë pikërisht një dëshirë e jona duke patur parasysh që idea në kokën time ka lindur goxha shpejt dhe dëshira ka qenë që post Zekiç të ishte Orgesi. Ia arritëm jo pa veshtirësi, besoj se me gjithë periudhën tranzitore që është bërë rezultatet mendoj se kanë qenë pozitive duke u mbyllur edhe me një trofe. Patjetër që ka shumë punë për tu bërë dhe në vazhdim do jetë Orgesi njeriu përgjegjës për projektin dhe pjesës që i përket fushës së lojës.

Në aspektin personal situatat kanë qenë goxha të vështira edhe në fushë edhe në drejtim. Nga momenti që Orgesi zgjidhi problemin me ish klubin e tij pastaj gjërat precipituan sepse ishte dëshira e përbashkët edhe e jona edhe e Orgesit për të arritur në këtë pikë.

Nga Tirana te Partizani, një kalim që mban nota të forta emocionale…

O.Shehi: Sigurisht që kur kalon nga një klub në një tjetër, kur dihet që të dyja klubet kanë histori të madhe dhe janë rivalë të përjetshëm, sigurisht që ka pak dozë emocionale. Por jam shumë i kënaqur dhe i lumtur që kthehem te Partizani. E shikoj që ka ndryshuar goxha nga periudha që kam qenë, si në infrastrukturë por dhe sa i përket ecurisë dhe titujve. Kështu që na mbetet një punë e madhe për ta mbajtur në këto standarde por edhe për ta çuar dhe më lartë.

Çfarë pritet në 2024 për Orges Shehin –

O.Shehi: Tani jemi në prezantimin e vitit të vjetër dhe për pak ditë hyjmë në vitin e ri. Shpresoj që 2024-a të jetë e suksesshme, si për klubin, si për mua, sepse mendoj që bashkëpunimi dhe puna është e përbashkët. Shpresoj që ky vit që vjen të jetë akoma dhe më i suksesshëm se viti që iku.

Çfarë pa Shehi te Partizani për të pranuar ofertën –

O.Shehi: Unë mendoj që çdo trajner nuk mendohet gjatë kur drejt tij vjen një ofertë nga një klub i madh, me histori, me infrastrukturë, me burime njerëzore, me njerëz që kanë ambicie për të shkuar lartë dhe për të kërkuar për më mirë. kështu që nuk ishte e vështirë për të zgjedhur. Kur përfundon punën në një klub tjetër, kërkon që klubi i ri të jetë gjithmonë në këto standarde që përmenda. Kështu që ishte e lehtë për të zgjedhur dhe për shkak të asaj që thash pak më parë. plus është dhe e shkuara ime, sepse nuk kanë qenë pak 4 vite që kam luajtur këtu.

A ju step mentaliteti shqiptar në përballjen e dy rivalëve sportive –

O.Shehi: E thash pak më parë, kur kalon nga një klub në një tjetër që kanë histori dhe janë rivalë të përjetshëm sportivë, çdo njeri e percepton dhe e mendon sipas asaj që ai kërkon ta mendojë ose ta perceptojë. Ne jemi profesionistë dhe kërkojmë që në profesionalizmin tonë të jemi korrekt, të jemi seriozë dhe të jemi strikt në parimet tona. Kështu që mendoj se nuk jam as i pari, as i fundit që kalon nga një klub në një tjetër, edhe për shkak të historisë së tyre. Kështu që përqendrimi është maksimal dhe mua më mbetet vetëm që të kemi punë, përpjekje, përqendrim, disiplinë dhe në fund fare të kemi atë që quhet fat. Pra fati është e kotë që të përmendet nëse nuk kemi këto elemente që përmenda.

Do ta bëje këtë kalim më shpejtë nëse nga Tirana do të kishit një trajtim më të mire –

O.Shehi: Nuk dua që t’i rikthehem ndarjes, sepse mendoj se çdo gjë është profesionale dhe jo personale, të paktën në këndvështrimin tim. Kështu që dua të fokusohem te e ardhmja, këtu ku jam sot. Shpresoj që këtu të rri sa më gjatë të jetë e mundur, sepse dëshira e trajnerit është që të rri sa më shumë dhe kryesore janë rezultate.

Ju ka dashur në dy raste dhe Shkëndija. Ju tundoi ndopak interesimi i tyre kësaj radhe –

O.Shehi: Unë mendoj që nga këtu  ku jam dhe në të ardhmen të flas vetëm për këtë tavolinë që jam këtu dhe për këtë stemë. Nuk ja vlen t’i kthehem diskutimit kush ishte e interesuar dhe kush jo. E tha dhe drejtori që pas asaj periudhe që përkoi me shkëputjen time nga ish-klubi im ishte një dëshirë e përbashkët dhe një vlerësim. Unë mendoj që shtë vlerësim sepse një klub i madh kur kërkon që të jesh pjesë e projektit është vlerësim dhe nuk ka asnjë dyshim.

Si e krahason këtë skuadër që ke marrë që është pretendent për kampion me Tiranën e para dy viteve? Ndryshimi mes këtyre dy ekipeve –

O.Shehi: Nuk ka ndryshim sepse të dyja klubet kërkojnë gjithmonë të jenë në majë. Dhe kur do të jesh në majë ke gjithmonë objektiva madhorë. Dhe objektivat madhorë nuk përmbushen dot nëse nuk ke lojtarët e duhur. Gjatë kësaj periudhe do të kem kohën që të njoh nga brenda dhe karakteret e individëve të veçantë. Njerëzit janë, infrastruktura është, na mbetet vetëm punë. Mendoj se ka një grup cilësor për të arritur objektivat.

Jeni koshient që duhet të bëni një punë voluminoze-

O.Shehi: E nis nga kjo e fundit, renditja, me këtë formulë që ka kampionati, nuk është një gjë që gjithë njerëzit që punojnë i vë në presion. Dihet që “Final 4” është e vëçant këtë vit. Unë kam gjetur një skuadër që para pak ditësh fitoi një trofe. Janë mendimet që çdo trofe që luhet duhet bërë maksimumi për ta fituar. Kështu që gjej një skuadër kompetitive, të paktën nga informacionet që kam nga brenda dhe jashtë. një skuadër me dëshirë, me djem të rinj që duan të ecin përpara. Është shumë e rëndësishme ego dhe dëshira, përpos cilësive që kanë.

Ju keni arritur që të bisedoni me drejtorin sportiv për repartet që skuadra ka nevojë të përforcohet –

O.Shehi: Sigurisht që çdo skuadër dhe elementet do i shkojë linjës së trajnerit. Kemi një periudhë që nuk kemi ndeshje zyrtare dhe kjo gjë do na shërbejë. Sigurisht që kërkojmë të përforcohemi. Çdo skuadër ka nevojë për elementë të rinj dhe cilësor. Duam të afrojmë lojtarë. Objektivat janë madhore dhe strategjia e klubit nuk është për të marrë lojtarë momentalë, por lojtarë afatgjatë, për të arritur objektivat për t’u rritur dhe gjithmonë për të pasur një strukturë të fortë për vazhdimësinë, sepse kjo është shumë e rëndësishme.